عارفه يامه من أعمال : على سلامه

أنا حاسس إن الموت
ما خدش منك غير الطرحه
والجلابيه السودة
ما أنا كل ما عدى جنب الاوضة
أسمع صوتك
وأنتى بتضحكى ع الدنيا
وبتدعى لى
روح
ربنا معاك
هاتسافر
وهاترجع مجبور الخاطر
وهستناك
طب إسندى على كتفى
بكره تقومى
بكره تخفى
عارف مين يا بنى بيقع ويقوم
أوعى تدور ع الدفا
فى فلوس وهدوم
ومتنساش تحوش شوية أصحاب
وافرح أوى لما يدق الباب
وتلاقى حد بيحضنك
لوجه الله
ياه
فاكره ياما لما كنتى
تعملى البصاره
وتدى منها لأبله سارة
يرجع الطبق رز بلبن
يروح لأم حسن
يرجع صنية بسيسة
تدى منها لخالتى بيسة
ويرجع الطبق مليان حب
معقول كل ده قلب
عارفه يامه
النهارده بقيت بخاف بجد
بخاف من أى حاجه
ومن أى حد
بخاف غصب عنى
أتخبط ف حد
لحسن يعملى محضر
ويطلب تعويض
مشيت كتير يامه
بس الفرح لسه بعيد
ياترى لسه بتدعى لى