الموتوسيكل المسروق

موضوع: الموتوسيكل المسروق 1/1/2017, 9:21 pm

الموتوسيكل المسروق

الشاب اللى فى الصوره ده اسمه (( وليد طلعت فهمى ))
من محافظه (( الاسكندريه )) ٠٠٠
من كام شهر كدا الموتوسيكل بتاع وليد (( اتسرق ))
فراح عمل محضر فى القسم ٠٠٠
بعد فتره الشرطه لقت (( الموتوسيكل )) مرمى فالشارع
الطبيعى و فى الامور اللى زى دى المفروض بييجى (( امين الشرطه )) وبيدور فى
(( المحاضر القديمه )) عن الموتوسيكلات (( المُبلغ بسرقتها )) ٠٠٠
ولما بيلاقى المحضر الخاص بالموتوسيكل بيتواصل مع (( صاحب الموتسيكل ))
ويبعتله ويقوله مبروك حضرتك احنا لقينا الموتوسيكل بتاعك
فتعالى حالا عشان تستلمه
بس طبعا ده محصلش
اللى حصل ان (( وليد )) راح صدفه يشوف الموتوسيكلات المحجوزه فى (( فناء المرور ))
وفعلا لقى الموتوسيكل بتاعه واقف منور
وليد فرح جدا ودخل بسرعه ل (( وحده الايواء والحجز )) ب (( مرور الاسكندريه ))
وقالهم عاوز استلم الموتوسيكل بتاعى اللى كان مسروق وواضح انكم لقيتوه

قالوله : انت تؤمر ياحبيبى عنينا ليك طبعا
بس حضرتك الموتوسيكل بتاعك واقف عندنا بقاله شهرين
فطبقاً للقانون المصرى وبحسبايه بسيطه
الموتوسيكل كده يبقى عليه ٣٦٥٠ جنيه بس
قالهم لاء انتوا غلطانين اكيد لان انا دافع كل حاجه ومستحيل يكون
(( عمل مخالفات )) فى خلال فتره السرقه بالمبلغ ده
قالوله : مخالفات !!! و مين ياابنى قال مخالفات بس

دى مش مخالفات دى حاجه اسمها مصاريف (( ايواء ))
للموتسيكل بتاعك عندنا فى الوحده

مش ذنبنا انك مش عارف القانون
قالهم ايواء ايه بس ؟ هو انتوا كنتوا بتاكلوه وتشربوه و ترضعوه ٠٠٠ ؟؟؟
قالوله اعتبرنا كنا بنعمل كده و دلوقتى بنطالبك ب (( نفقه الموتوسيكل ))
قالهم طب مدام وصلت لكده يبقى بينى وبينكم (( محكمه الاسره )) وسابهم وخرج

(( وليد )) خرج من المرور مهموم والدنيا اسودت فى وشه ٠٠٠
فعقد العزم على خطوته الجايه ٠٠٠
الانتحار طبعا

وليد دخل (( مبنى المحافظه )) فى اسكندريه ٠٠٠
وطلع لحد السطح ٠٠٠
وقلعلهم بلبوصه ٠٠٠

وقالهم هرمى نفسى لو مسلمتونيش الموتوسيكل حالا ٠٠٠
(( امن المحافظه )) بلغ (( محافظ الاسكندريه )) ان فى واحد
(( قالع )) و واقف فوق عالسطح و عاوز ينتحر و(( هيعملنا مصيبه ))
فى الاعلام ٠٠٠
المحافظ طلعله ٠٠٠
وبعد فتره من التفاوض بين (( وليد وبين المحافظ )) :
وليد لبس هدومه ونزل ٠٠٠
واخد الموتوسيكل بتاعه ٠٠٠
وروح بيته ٠٠٠
و مدفعش جنيه

وليد انسان (( ايجابى )) و بدا اول يوم فى (( ٢٠١٧ ))
باستيراتيجيه مختلفه وبفكر جديد يُحسد عليه الصراحه

وليد انسان ذكى ٠٠٠
فكن مثل وليد ٠٠٠
وكل لما تتزنق اقلع ٠٠٠

» الكلب الإندونيسي الذى يقود الموتوسيكل بمهارة