موضوع للمناقشه

موضوع للمناقشه





نظرا للظروف الرائعة التى تمر بها #مصر من انقطاع للكهرباء
فبدلا من أن تلعن الظلام فأوجد حلا للمشكلة ( وبعدين العن اهله برده هو واللى كان السبب )
المهم موضوع انقطاع الكهرباء ده سخيف لأنه مش مجرد انك بتكون محتاج اضائة وخلاص
لا تخيل مثلا احساسك فى الصيف ورمضان فى عز الحر قبل الفطار وانت نفسك تنام وتكون الكهرباء قاطعة
وبالتالى المراوح مش شغالة
أو انك محتاج تتفرج على التليفزيون او محتاج انترنت أو حتى محتاج الخلاط وهكذا

فالحل فى وجود مصدر كهرباء أخر فى فترة انقطاع الكهرباء

الحل الطبيعى بيكون حاجة من اتنين

أما انك تشترى مولد وده كويس لكن عيوبه:
1- سعره الغالى
2- احتياجه الدائم للوقود يعنى هتخلص من أزمة الكهرباء هتدخل فى أزمة البنزين
3- صوته العالى والعادم الخارج منه
4- بيكون الخطر مضاعف فيه لوجود أجزاء ميكانيكية متحركة وأجزاء كهربية و وقود قابل للإشتعال

فكان حل المولد ده غير عملى

الحاجة التانية ما يسمى بال
UPS ( Un-inturrupted Poewr Supply )

وهو بمنتهى البساطة شاحن بطارية + بطارية +جهاز بيحول فولت البطارية المستمر إلى فولت متردد ( يسمى انفرتر (

عيوبه :

1- سعره الغالى
2- سعر البطاريات ( اللى هى العنصر اللى بيستهلك غالى أيضا ) ولازم يكون من نفس الشركة المصنعة
3- مجموع بطارياته فى الغالب تشغلك حوالى 10 دقائق أو ربع ساعة طبعا حسب الحمل

فكان الحل المناسب بالنسبة لى انى اجمع ال
UPS
بدلا من ان اشتريه

فاشتريت بطارية سيارة - لو هتجيبها جديدة تمنها حوالى 400-600 جنية ويستحسن أنها تكون 70 أمبير ساعة مش 55 لانها هتشغلك وقت اطول

وانفرتر 1000 وات ( تمنه جديد حوالى 500 جنية ) وده اللى بيحول الفولت المستمر لفولت متردد - ده اللى موجود فى الصورة فوق البطارية

وتونجر (تمنه 270 جنية من شارع الجمهورية ) وده اللى هو بيشحن البطارية زى اللى عند الكهربائى -اللى لونه أصفر فى الصورة

عمله فى منتهى البساطة

أثناء وجود الكهرباء بتوصل التونجر بالكهرباء وتشحن البطارية
ولما الكهرباء تقطع بتوصل الانفرتر على البطارية زى الصورة وتاخد كهرباء من خرج الانفرتر

السؤال الأهم ( هيفضل شغال لمدة كام ساعة ) وده على حسب الحمل وسعة البطارية

مثال

Battery capacity = 70 AH
أولا بنحول سعة البطارية من أمبير ساعة إلى وات ساعة

Battery Capacity = 70AH * 12V = 840 WH

وساعتها نرجع لمجموع الأحمال

نفترض أن عندى 3 لمبات موفرة وكل واحدة فيهم بتستهلك 20 وات
بفرض ان ال
Power Factor = 1
يعنى الحمل محترم ومش بيهدر طاقة

اما لو الحمل مروحة مثلا فساعتها لازم تعرف ال
Apparent power
بتاعتها لان هى دى اللى هتحسب عليها
اسهل طريقة لو مش عارف تحسبها , انك تجيب كلامب أمبير وتقيس الأمبير المسحوب وتضربه فى 220

نرجع لمثال ال 3 لمبات ويبقى كده عندى أحمال قيمتها 60 وات

دلوقتى اقدر أحسب الوقت اللى المفروض البطارية تستمر فى تغذية الأحمال فيه

840WH / (60W + 10W (losses in inverter) ) = 12 hrs

وهكذا تقدر تحسب الوقت لأى مجموعة احمال.. طبعا قبل ما تشغل اتأكد لو فى حمل عندك بيستهلك بور عالية أو بمعنى أدق أمبير عالى حاول تفصله علشان البطارية تشتغل معاك وقت أطول

طيب لو محتاج تشغل مروحة سقف أو إضاءة الغرفة الطبيعية ومش مجرد انك هتوصل حمل مباشر على خرج الانفرتر ؟
طبعا تقدر بسهولة

أولا بتشوف عندك فى دخل الشقة المفتاح الرئيسى
MCB

لو عندك الأحمال مثلا متقسمة غرفة رقم 1 مع مفتاح رقم 1 يبقى ساعتها تفصل المفتاح ده لما الكهرباء تقطع
وتوصل خرج الانفرتر فى أى بريزة فى الغرفة
طبعا لو عندك البرايز على مفتاح لوحدها غير باقى الأحمال مش هتقدر تعمل الحركة دى

أخيرا ليه الحل ده احسن من انى اشترى يو بى اس جاهز ؟
لعدة أسباب

1- عند ثبوت قدرة الانفرتر والأمبير ساعة للبطارية لو هتشترى انفرتر هتشتريه بحوالى 3 أو 4 أضعاف سعر التجميع ده
2- لو حصل مشكلة فى أى جزء من ده تقدر تغيره لوحده يعنى تقدر تشترى اى انفرتر او أى بطارية أو أى تونجر بعكس لو مشتريه جاهز لازم ترجعه للشركة الممصنعة لو حصل مشكلة فيه
3- زى ماذكرنا قبل كده ان سعر بطاريات الجهاز الكامل غالية وسعتها اقل من بطارية السيارة

أخيرا : تحذيرات هامة

لو عملت أى حاجة من الكلام التالى فى حاجة هتتحرق عندك

1- وانت بتشحن البطارية أو بتفرغها لو عكست السالب مكان الموجب
2- لو وضعت على خرج الأنفرتر 220 هيتحرق
3- لو مجموع الأحمال اكتر من قدرة الانفرتر 1000 وات مثلا وساعتها الانفرتر هيفصل بس مش هيتحرق

وبكده تبقى الكهرباء قاطعة فى كل المنطقة وانت عندك كهرباء

الموضوع مفتوح للنقاش ومرحب بالنقد الفنى
الموضوع من إعداد المهندس
https://www.facebook.com/Engmmohie




=450204835059464&p[1]=10202842492116928&profile_id=450204835059464&share_source_type=unknown]