انهارده هتكلم عن السفر للخارجه ومشكلاته لانى فى موضوعى السابق الى بيتكلم عن المراه المصريه والاجنبيه لقيت ردود كتير عايزه تتناقش فى الموضوع ده ومن هنا بفتح مجال المناقشه مع ان الموضوع ده انفتح كتير داخل القهوه هنا بس حبيت اعبر هنا عن وجهت نظرى فى الموضوع ده
يا ترى فى حب هجره شبابنا للخارج فى عوامل كتير بتدفعهم لده ومعظم العوامل ده احنا شيفنها عاديه ومن اهم هذه العوامل هى:
الاباء: لما الشاب بيبلغ سن 17 سنه بيكون كبر الى حد ما زمان ايام ولدى كان الاب لما ابنه يتم 17 سنه بيخليه يشتغل ولما تساله يقولك عشان الولد عضمه ينشف ويعرف يعنى ايه شغل وفلوس حتى ولو كان الاب ده معاه قدر من المال يكفى ابنه من الشغل ولكن هدفهم هو زياده صلابه ابنهم عشان بعد كده يقدر يفتح بيت
وكان زمان يسيب ابنه يشتغل فى اى حاجه جرسون او بياع او شيال او اى حاجه وساعات يرجع بليل من الشغل ووراه بكره مدرسه او كليه وعادى وفعلا كان الابن بيعرف يعنى ايه فلوس ويعنى ايه تعب هو اه بيتعب بس بيعرف وبيشيل مسئوليه
اما دلوقتى تلاقى الاب يقول وانا اشغل ابنى ليه واعطله عن الدراسه انا معايا فلوس تكفيه هو مش محتاج شغل وبينظر ليها بمنظور الماديه وبينسى ان ده تعليم لابنه وبعد ما الابن يكبر ويخرج لساحه العمل بيكون مش عارف يتصرف وبيخاف ومش بيقدر الشغل ويسيب ده ويمسك ده بحثاً عن الوظيفه المريحه الى فيها مكتب ده اذا لو ابوه ما شغلهوش
تانى عامل:
زراعه المزايا للهجره والعمل للخارج: لما الشاب من دول يسمع الفلان كذا خد كذا فى الساعه وده عمل كذا وده جاب عربيه كده وده اتجوز وحده كده من امريكا وخد الجنسيه كل ده عوامل بتاثر على الشباب وخاصه انه بيشوف فى بلده ان معظم الوظايف المتاحه غير مجزيه ومش بيقدروا تعب الشخص وما فيش ساعات عمل محدده كله فى بعضه وكل ده حاجات اكيد بتلفت نظره وبتغريه وبيخليه مخطط وهو فى ابتدائى اول ما اخلص دراسه هسافر بره اشتغل
وكمان فى عوامل كتير حولينا بس احنا مش شيفنها انا عشان بنت ممكن ما اشوف حاجات الولاد هما شيفنها فياريت كل واحد يقول ايه هى العوامل الى بتاثر على الموضوع ده
وشكرا ليكم حسين عبد النبى