المستشار عثمان الكومى المديـــــــــر العـــــــــــــام
علـــم الدولــــة :
| موضوع: يا عم أمين مهداة إلى الشاعر أمين الديب 26/10/2008, 5:33 pm | |
| يا عم أمين
سيد الموجى ياعم أمين يا ( نكلاوى) مادام ناوى تفكرنا بزمن النكلة والمليم وتفتح خزنة الأيام يفوح منها عبير أحلام طفولتنا ولمتنا على الطبلية عشرين إيد بناكل من طبق واحد ونتقاسم رغيف واحد غموس واحد ونهمس فى نَفَس واحد- بقصد البركة - بسم الله ونشرب سلسبيل النيل من القلُة ونتحلى بنبوت الغفير وساعات بفتافيت باقى قمع السكر المصروف مع التموين ونتسلى بلعب البلى والنحلة وحدف الطوب على النخلة وبالفرجة على الأراجوز ولما نعوز ننام بننام متاعب يومنا منسية وكل حاجاتنا مقضية قضيتنا نعيش فى سلام وكنا حقيقى بنحقق بكل بساطة أحلامنا البسيطة قوى مع الأيام ولما الليل يلف بيوتنا بسكونه وعقد نجومه فوق سدر السما بياخد مشاعرنا معاه لبعيد كأن الليلة ليلة عيد وثومة تقول ولما نقول ( أعد ) بتعيد وصوت العندليب يفتح بيبان العشق للهايمين وآه من لسعة الأشواق يا عم أمين يا عاشق ( نكلا ) إحنا كمان بيعشق كل واحد مننا ( نكلاه ) ! وهل فيه أى شئ غير الوطن نسجد له بعد الله ؟ وهل تبقى الحياة من غير براح الريف يا صاحبى حياة ؟ يا عم أمين يا ديب يا أديب مفيش فيك عيب سوى إنك صرخت وناس كتير صامتين وكانت صرختك نغمة نشاز فى سمفونية ( كله على كله) و ( كله تمام ) بقيت واضح فى شارع زحمة كله غموض وصادق فى زمن أكاذيب بتلمس جرحنا بأشعارك الواخدانا لماجور العجين والزير وبير الساقية والمحرات وجرن الغلة والطنبور وشجر التوت وصوت الراديو بيذيع نشرة الأخبار وكل الموجودين فى القعدة فوق المصطبة ( سمع هس ) منتظرين خطاب هيقوله عبد الناصر المصرى الأصيل الحر خلاص ولى زمان القهر والعبودية والإقطاع والاستعمار ويتبقى سؤال محتار صحيح ولى يا عم أمين ؟ وهل كان الكلام دا جد والا هزار ؟! ولو كان جد يبقى العيب فى مين قوللى هل العيب فى اللى واقفين فى طابور العيش منسيهم وقوفهم حتى أساميهم ؟ فى رأيى أنا أكيد فيهم عشان بيرددوا دايما بدون تفكير ورا اللى يقول ( ولا الضالين ) ( آمين ) وسلام ياعم أمين ! | |
|