حوار مع الأبنودى

موضوع: حوار مع الأبنودى 12/7/2008, 2:14 am

الأبنودي في حوار خاص
سافرت للعلاج علي طائرة أميرعربي كبير

حوار مع الأبنودى 610600

في هذا الحوار المثير يكشف لنا الشاعر الكبير عبد الرحمن الأبنودي كثيرا من الملابسات التي صاحبت رحلة سفره وعلاجه في الخارج ،وحكاية الـ 20 الف يورو التي دفعها في المستشفي الأمريكي بباريس تحت الحساب وعند خروجه اكتشف انه تعرض لعملية سطو كالتي تحدث في الموالد الشعبية،أما المفاجأة الحقيقية التي فجرها حواره معنا فهي انه لم يسافر على نفقة الدولة كما كنا نعتقد ،وانما علي طائرة أمير عربي عز عليه أن يري الشاعر الكبير مريضاً ولا أحد يحرك ساكنا.

وحذر الأبنودي في نهاية حواره من تفاقم غضب الشعب المصري وقال ضمن ماقاله : ربنا مايورينا غضبه ، ولو أحرق العربيات و البيوت والعمارات لن يخسر شيئاً لأنه لم يعد هناك مايملكه بعدما بيعت كل مقدراته.. وقضايا أخرى كثيرة في حواره الذي امتد معنا أكثر من الساعة ، قلت له :

محيط / الشاعر الكبير عبد الرحمن الأبنودي نريد أن نطمئن قراء " محيط " علي صحتك
- إن شاء الله كويس طالما اللسان بيتكلم ودول كويسين – يشير إلي قلبه ودماغه – الباقي مقدور عليه حتي لو ماكنتش أقدر أمشي واتحرك .
محيط / ولماذا إذن كنت ترفض بشدة فكرة السفر إلي الخارج لتلقي العلاج ؟

- الحقيقه أنا لم أكن أريد السفر لأنني كنت في حالة مرضية سيئة ولا أحب أن أعود من الخارج كجثة ، أحب أن أموت في بيتي وسط أولادي وهذا ما قلته ، قلت : المرة دي أنا أريد أقعد وسط أولادي لأن حالتي كانت شديدة السوء ، لدرجة انني عندما سافرت ظل الأطباء حوالي 25 يوماً في غرفتي لايغادرونها ، إلي أن بدأت اتنفس واتكلم ،أضف إلي ذلك أن ظهري مكسور وبطني منتفخة ، لدرجة أن ابنة أختي لاحظت ذلك وقالت لي : يا خال كرشك كان واصل إلي صدرك ، وطوال وجودي في باريس الـ 45 يوم لم آكل شيئاً ، سوي شرب المياه وحتى الطعام بدون ملح وبدون دهون ، مع أن احنا الفلاحين أو الصعايده بنحب الملح ، واتضح أن الملح ده أخطر حاجة على صحة البني آدم فهو يؤثر علي الضغط والسكر في الدم وحاجات كتير مانعرفهاش لكن بعد 30يوم تقريباً ، جاءني الطبيب وقالي لي : قوم نمشي شويه أمام الغرفة ومشينا و الممرضه وراءنا بجهاز الأكسجين ، وبعد يومين قالي لي : تعالي نطلع السلم" 7سلالم " طلعتهم ونزلتهم مرتين وهكذا .. شوية وقال لي : تعالي ننزل الدور اللي تحت وقعد يلففني في الممرات ونحيي الممرضات والأطباء باعتباري كنت أشهر مريض في المستشفي .
والمستشفي الأمريكي في فرنسا قديم وعتيق ومبانيه كلاسيكية ، وأطلقوا عليّ لقب "المريض الشجاع" ، لانهم اعجبوا ببسالتي وإصراري علي الشفاء .
محيط / ومن أقنعك بفكرة السفر بعد رفضك القاطع لها ؟

- الأستاذ محمود درويش فوجئت به يتصل بي بعد إذاعة الخبر في برنامج مني الشاذلي "العاشره مساء" علي محطة دريم ، وسألني عما سمعه في البرنامج فأكدته له فأصر علي سفري فوراً ، وقال : احنا معندناش اتنين عبد الرحمن الأبنودي ، انت عارف انا بحبك جداً قد إيه ، ولازم تسافر ، ايضاً الأستاذ محمد حسنين هيكل قال لي : لازم تروح باريس .
ايضا صديقي الأمير السعودي عبد الرحمن بن مساعد وهو شاعر عامية سعودية رائع ، ومثلما أنا صعيدي عملت لغة تفهمها الأمة العربية ، وهو ايضاً عمل ده بالنسبة للسعودية وخرج من اللهجة النمطية بحيث تستطيع قراءته ، وهو ايضاً يملك صفات انسانية عالية جداً .. راجل عظيم الشأن ، فوجئت به يطلبني تليفونياً ويقول لي يا عبد الرحمن خد بعضك وتعالي فوراً ، هابعت لك طيارة قلت : ماتبعتش حاجة ، فقال : لا تعالي فوراً وحدد ميعاد لارسل اليك طيارتي الخاصه وأمام إصراره وافقت، وأدخلني المستشفي والدولة بعد كدة أصدرت قرارها بعلاجي علي نفقتها وقلت وقتها : أنا عرفت دلوقتي ليه الناس اللي بتتعالج علي نفقة الدولة بتموت بعد صدور القرار ، لإن الورق المطلوب لصدور القرار يحتاج إلي شخص صحيح البدن لتحضيره .. المهم سافرت علي طائرة صديقي ولما وصلت مطار باريس وجدت سيارة إسعاف في انتظاري وتوجهت بي فورا إلى المستشفى ، وبعد يومين جاءني المسئول الطبي في السفارة المصرية وقال إن القرار جاءه، ثم فوجئت بمكالمة الرئيس مبارك لي ، ويقول محاولا تخفيف الأمر : يا عبد الرحمن انت كل شهر تتعب ولا إيه ؟
قلت : ماحدش بيحب المرض مش في سننا ده ، وهو انا متضايق من مصر .. انا عاشق ترابها وناسها .
فقال : طيب .. عندك دلوقتي السفير وهوه عنده تنبيه إن أي حاجة تعوزها تطلبها منه .
بعد كام يوم كلمني الدكتور زكريا عزمي ، وقال لي يا عبد الرحمن ، فيه تقرير طبي أمامي بيقول إن الحكاية بجد وواضح انها هاتاخد علاج طويل فقلت : انا هاقعد هنا علي ما أدبر أموري ، فقال : لا ، احنا فتحناهالك بدون حد أقصي حتى تستكمل كل مراحل علاجك .
وجاء السفير وزارني ، وأي وزير كان يأتي باريس أفاجأ بزيارته لي.. الدكتور هاني هلال وزير التعليم .. السيدة عائشة عبد الهادي زارتني مرتين ..الفنان محمود عبد العزيز كان هناك من أجل فيلمه " ليلة البيبي دول " وزارني 3مرات ، وأقول له : يا عم انت حبيت خلاص ، وماكنتش اعرف انه عاطفي قوي كده فيقول : يعني انا هنا ولاأزورك ؟ غير المكالمات التليفونية الكثيرة من ناس عاديين وفنانين ... انغام وسيمون .
إلى أن أمضيت فتره العلاج والمستشار الطبي عمل لي حاجة كويسة وهي انه صرف لي الدواء لمدة 6شهور لحين عودتي مره أخري إلي باريس .

حوار مع الأبنودى 610601

[size=9]الشاعر الكبير أثناء حواره مع الزميل محمد المكاوى[/size]

دفعت 20ألف يورو ولما سألت عنهم قالوا لي:

المستشار الطبي أدخلها في قرار العلاج !

محيط / ومن تكفل بعلاجك في باريس .. هل هو صديقك أم القرارالذي صدر لك بالعلاج علي نفقة الدولة ؟
- لا تكاليف العلاج دفعتها الدولة وأنا دفعت 20ألف يورو أي ما يوازي 160 ألف جنيه .
محيط / ولماذا دفعت انت طالما القرار الصادر لك بدون حد أقصي ؟
- امر الله .. لأنني عندما ذهبت للمستشفي وضعتهم تحت الحساب ، حيث لم يكن من الممكن دخولي المستشفي دون أن أدفع مبلغ تحت الحساب ، وبعد يومين جاء المستشار الطبي ومعه القرار ، وقبل خروجي حاسب المستشفي وأخذ الـ 20 ألف يورو وحتي اللحظة لا اعرف لماذا ؟ وبصراحة حاسس إني اتنشلت في مولد وبعدين يقولوا انني اتعالجت علي حساب الدولة ، طب إزاي ؟!
محيط / وما حكاية سفرك إلي المانيا ؟
- يبدو إن علاج الكورتيزون أثر علي الفقرة التاسعة في عمودي الفقري فأفرغت الكالسيوم وتآكلت فأصبح هناك فراغ كبير بين فقرتين وعرفت انهم في ألمانيا متخصصون في العظام ، ولما محمد منير كان هناك موخراً إتصل بي ليطمئن علي صحتي وطلب من الطبيب الذي يعالجه من آلام العمود الفقري أن يحدثني تليفونياً وهو مصري مقيم هناك اسمه الدكتور ياسر وهو مساعد لبروفسير كبير قوي متخصص في جراحات العمود الفقري ، وقال إن هناك الكثير من الحالات المتشابهه التي أجراها البروفيسير لمرضى من جنسيات مختلفة، ولكن أنا أوضحت له انني أرغب في السفر بنفس الطريقة التي سافرت بها إلي باريس لانني أسافر وأجد كل شيئ مرتباً بداية من الطبيب المعالج والمستشفي والمكان .
محيط / الشاعر الكبير عبد الرحمن الأبنودي.. اسمح لي أن انتقل بك إلي عالم الفن ... واسألك رغم كونك شاعر غنائي كبير الا انني أشعر إن تيار الغناء لم يجرفك ناحيته وابداعاتك الشعرية تكاد تطغى علي ماكتبته من أغنيات .. فهل هذا صحيح ؟
- نعم وتفسير ذلك انني شاعر من المقام الأول وأعرف طول عمري انني جئت لأكون " الشاعر " ومن سنة 64 كنت كل سنه بأطبع ديوان جديد لي .. " الأرض والعيال " .. " الزحمة " " عماليات" .. " حراجي القط " .. " علي حسابي وكانت الأغاني هي التي تمول هذه الدواوين . وذلك كان سببا رئيسياً لكتابتي للأغاني يعني مثلا "حراجي" مدين لعدوية ووهيبه .
محيط / إذن كتابتك للأغاني لم تكن بدافع حبك للغناء أو سعيا وراء الشهرة؟
- لا .. أنا كنت بحب الغناء لإن العمل عندنا في " أبنود " مرتبط بالغناء وتحديدا ما كانت تغنيه "فاطمه قنديل" أمي رحمة الله عليها ، يعني أنا مرة اخذت أغنية كاملة منها ووضعتها في فيلم " عرق البلح " للمخرج رضوان الكاشف ، وقلت لأخونا ياسر عبد الرحمن ضعها كما غنتها أمي ، لا أنا أضع كلمة ولا انت تؤلف نغمة مخالفة وهي أغنية " بيبه " .. دي غنوة أمي وهو وضع لها توزيعاً موسيقياً ووضع لها بناء موسيقيا جميلاً لانها جملة شعبية ولو لم تكن تعيش لولا انها حقيقية وأصيلة زي أغنية " أنا كل ما اجول التوبه " مثلا.
محيط / بمناسبة هذه الأغنيه - انا كل اقول التوبة - ما رأيك في غناء ماجدة الرومي لها ؟
- عندما غني عبد الحليم حافظ هذه الأغنيه كان يغير جلده ويحاول الخروج من الشرنقة لإن محمد رشدي " زنق " عليه والدنيا كانت تتغير من حوله ولإن عبد الحليم كان فنانا ذكيا ، فقد غناها لكن خائف ومتوتر عشان مافيهاش .. الشعر الحرير ع الخدود يهفف ويرجع يطير لكن فيها ، القلب الأخضراني ولغة أخري فكان حاطط إيده علي قلبه ، وماجده الرومي اخذتها جاهزة بعدما نجحت وأصبحت من كلاسيكيات الغناء .
محيط / لكنك تحدثت عن غناء عبد الحليم لها مره بشكل سلبي ومره بشكل إيجابي ؟
- أصل لما همة وزعوها – علي اسماعيل رحمة الله عليه – فأنا طلعت في الراديو وكنت سليط اللسان حقيقة وقلت إن التوزيع الموسيقي غير مناسب ، وأنا عذبت عبد الحليم خالي بالك.
محيط / هل هذا اعتراف منك في حق عبد الحليم الآن؟
- ده حقيقي وهو احتملني كما لم يحتمل انسان آخر في حياته بشهادة كل اصدقائه ، الراجل ماكنش عارف يعمل لي إيه ، يعني مثلاً يوم ما طلعت من السجن ، أولا وأنا في السجن كان يبعت لي السجائر اللي يدخن منها 39 مسجون معي ويرجو المسئولين والضباط الكبار لكي يسمحوا له بإرسال السجائر لي ، ويوم خروجي من السجن - كنت أسكن في بيت قديم مابين ميدان التحرير وباب اللوق – وفجأة سمعت جرس الباب واذا بي افتح الباب فأجد عبد الحليم أمامي بعدما صعد سلم طويل قوي – 3أدوار من المباني القديمة وخلفه مجدي العمروسي يلهث من التعب .. والله العظيم كان بيوزع الحاجة الساقعة علي الناس وأصر علي أن يحمل الصينية بنفسه ، وبصراحة عاملني كما لم يعاملني أحد في الوسط الفني .
بعد النكسة قلت لحليم:
حوار مع الأبنودى 610599

انت حاجة وأنا حاجة ..وافترقنا
محيط / إذا كان عبد الحليم يحمل لك هذا الحب وكل هذا التقدير ، فلماذا وقع الخلاف بينكما ؟
- انا دائماً عندي تناقض بين الشاعر ومؤلف الأغاني ودائماً كنت أعمل مسافه بيني وبين المغنيين و الوحيد اللي ما عملتش معه هذه المسافة هو محمد رشدي، وبعد نكسة 67 قال لي عبد الحليم : يا عبد الرحمن أنا عندي شركة وناس وعمال لازم يأخذوا مرتبات ، فقلت : يعني قصدك نكتب أغاني عاطفية فقال : اه ، فقلت : لا أنا مش معاك ، ودي بقي الفترة اللي رحت فيها السويس وعملت "يابيوت السويس" و"وجوه علي الشط" والحقيقه الراجل كان منزعج مش عاوز يسيبني وفي نفس الوقت عنده ضرورات طب يعمل ايه ؟
محيط / هل انت الآن تلتمس له الأعذار ؟
- ابدا.. لكن أريد أن أقول إن موقفي كان صحيح وهو ايضاً موقفه صحيح ، يا إما كده يا إما الشركة تغلق أبوابها ، وشوف النكسة قعدت قد ايه ، من 67 إلي 73 ، هل كان هايفضل يدفع الفلوس للموظفين واللا يهد الشركة .. هوه عنده حق لكن أنا كمان عندي حق .. أنا معنديش شركة ودي شركة عبد الحليم وعبد الوهاب .. وأنا مالي حتي الغناء كل اللي عملته له منذ عام 67 من أول أحلف بسماها وبترابها مرورا بإبنك يقولك يابطل ، يابركان الغضب لغاية عدي النهار والمسيح وصباح الخير يا سينا ، ما اخذناش فيها فلوس فموقفي لم يكن فيه تناقض يعني لم اخذ من جيبه فلوس وقلت له : لا تدفع مرتبات لموظفي الشركة لم يحدث ابداً ، فقد كنت في غيبوبة وطنية ولم أكن وحدي وانما معنا بليغ حمدي وكمال الطويل والموجي من أول أغنية " اضرب " لم يتقاضي أحد منا فلوس ولم يخطر علي باله ذلك أبداً .
لم أكن افهم حكاية الموظفين والمرتبات لإن طول عمري أنا أحس بالموظفين لذلك قلت له : مقدرش .. انت حاجة وانا حاجة .
محيط / الشاعر الكبير عبد الرحمن الأبنودي .. ما القضية التي تشغل بالك الآن ؟
القضية التي تشغلني جدا الآن هي أحوال الشعب المصري وهذا الإصرار علي نرفزته وتعذيبه وإيذائه وخايف منه .. خايف من الشعب المصري .. يعني اتقي شر الحليم اذا غضب .

أحزنني وفاة عبد العاطي بطل أكتوبر
حوار مع الأبنودى 610612

وهو لا يجد ثمن الدواء
محيط / وكيف عبرت عنها عبر قصائدك ؟
يعني مثلاً أحزنني جدا أن عبد العاطي صائد الدبابات مات بفيروس c ولا يعرف أحد عنه شيئاً ، بل لم يجد ثمن الدواء ولم ينقذه أحد !! ولم يسأل عنه أحد .
ويتوقف الشاعر الكبير ليلتقط انفاسه قليلا ثم يقول : عبد العاطي أجمل رموز حرب أكتوبر الذي أسر قائد الدبابات الإسرائيلي " عساف يا جوري " هل تصدق انه هبط علي وانا في غرفتي في باريس ؟... هبط علي زي الكابوس ، احاول الهرب منه بلا فائده لم أستطع .. وكتبت قصيدة .. " عبد العاطي " ، مش ممكن الافتراء بتاعنا ده ايه ده ؟! نفس الحكاية ... الناس التي تموت في طوابير الخبز .. لا .. لا .. الشعب المصري نبيل جداً ويجب أن يعامل بنبل ، ما العالم كان رأس مالي ، لكننا لم نري رأس ماليه تلتهم رقاب الناس كدة .
ربنا مايوريك غضب الشعب المصري .. لانه الآن في مرحلة غضب وربنا يحمي مصر من غضبه ، لانه يشعر انه لم يعد يملك فيها شيئاً ، ولو أحرقها لن يخسر شيئاً لو أحرق العربيات والبيوت والعمارات التي بناها علي أكتافه ،أصل الرأس ماليه فاكره إن مارينا بعيدة عنه ؟إزاي دا هوه الذي بناها ويعرفها بدقه ، ماينفعش تستولي علي مقدراته وتبيع كل ما يمكله وتلهفه وتتركه هكذا ....!
انتهى الحوار ولكن شريط التسجيل لايزال يدور

حوار مع الأبنودى 610613

موضوع: رد: حوار مع الأبنودى 12/7/2008, 2:15 am

اكشف غطا وجهك ومزع القناع
بلا حكومة . بلا حكومة
بى بطولة بلا بتاع
ياأسمر يأبو القلب الحديد
ياللي واجهت الموت ... في كل اتساع
ياأسمر يأبو الوجه العنيد
يا مصري ... ولحد النخاع
كله طلع كلام يا خال !!
والحال ..رجع تاني حال
أتاري الحرام..... هوه الحلال
وأتاري الهدى هوه الضلال
شموا نفسهم من جديد .
والمرة دي ..
بدمك أنت يا بطل .... مع الأسف
وبعجنة اللحم اللي تتسمى الشهيد
ويعملوها عيد بليد
تعرفشيه غير م الصحف .
واعترف ....
العيد بييجي ...
لاجل ما تموت من جديد
ولو ان موتك ريح بتغلب الرياح
لكنه ما حركش ليه أسن الحياه؟
ويا صاحبي ....
ما حركش ليه ألم الجراح؟
راح اللي راح
فلا انتظار ولا أمل
الحرب خلصت يابطل
والفرحة هبت في الوطن ياصاحبي
من كل اتجاه
وزي ما قالوا: طلع نور الصباح
ورفرف العلم العظيم العالي
على كل الجباه
لكنه...
ليه من غير حياه؟
والنصر ليه على رقاب كل اللي عملوه
اتكى ؟
وليه في أرض المعركه
نسينا كل اللي بلغناه
بالمعاناه
والعرق وبالفخار ..وبالبكا
لما يا صاحبي ع الحلم اللي ضاع
ونصرك اللي راح وما عادلوش شهود
وما عادش داخل الحدود
غير اللي سمسر
واللي قرقر
واللي وفر ... واللي باع
****

موضوع: رد: حوار مع الأبنودى 12/7/2008, 2:16 am

اللي هوى الوطن .....هوى
بالعشق ولع وانكوى

من قبل ما يفتح ..... ذوى
يا أحلا أبناء الوطن
نرحل عليل......... بلا دوا
ترحل وحيد مجهول ...حزين
نرحل سوا

****

نرحل سوا. أنا وانت والوطن الحبيب
ونسيبها للوطن الغريب
نسيبها للوطن المريب
لديب .. بيحرس الجياع
والوهم اذا كشكش

..

بيزداد اتساع
وانت العريس اللي بنيت المجد
بايديك الجمال
وبقيت دريس طاو في الخيال
وكئن حربك النبيله
لعبه لعبوها العيال

لعبوها ع الساكت
اتمرمغت الصفحة اللي فيها اسمك
حدوته

...!

وشط الحواديت تاهت
الاسم مشطوب
والتاريخ ....باهت
ما فضلشي منه شيء يا عبد العاطي
لم العو دباباته بعيد عن سينا
نسونا.............. فنسينا
والاسم
كان لازم في سكة الخيانه
يتردم
واللي كتب عنك ندم
واللي وقف جنبك ندم
اضطر يفضح لعبة التبديد
وحاصروه بالوصم والتهديد
صبح الشريف موصوم
هوه الشريف اللي تمللي يتوصم
وبقى السليم مجزوم
يستعملوا وياه ياخال

لغة الجزم
وبقى الجبان صنديد
فارحل حزين مظلوم
ارحل سفيه موصوم
ارحل مريض ساكت
ارحل الى أبعد بعيد

*********

موضوع: رد: حوار مع الأبنودى 12/7/2008, 2:17 am

مصر المهيبه بتنحدر للواطي
هل كنت تتخيل في يوم
السرعة دي في الموت يا عبد العاطي
حتى وانت . قصاد صفوف الدبابات ؟
سامحني أنا ماعرفش كام عندك
من الأولاد وم البنات

.

هل كنت تتخيل خيانة الوطن؟

!

هل كنت تتخيل عبير هذا الزمن؟

!

وهو صاعد للعلا نتن..؟

!

وقول بحق

.

ان كان قلبك خاف
والأر بي جي

مسنود على الأكتاف
ساعة اغتيال عساف؟
وهل خطر ع البال يا عبد العاطي
ان الخيانه حتسكن الآتي؟

!

وان ملعوب لاتفاق ملعوب ؟
وان اكتوبر حيتباع ويا مصر؟
ــ الاتنين ــ في سوق العصر..؟
والمؤمنين

حيطردوا من صيغة المستقبل
ويصعد الخاطي ؟

!!

دلوقت ايه اللي مضيق
صدرك الوسيع؟
وبتفهم ازاي الفروق
بين اشترا الوطن الأسير
والبيع؟
النصر تمنه اشتروا بيه قصر
تمن الوطن
اذن لدخول السمسره
ماكنتش حرب
ماكنش نصر
واللي رفضناه لاجل نتقدم
حدفنا بعيد ورا

*******

ما تقولش زيي كان وكان
كان حيلة لاجل يموت فقيرها
في طوابير الهوان
وطنك يا صاحبي كان زمان
واللي احنا فيه

زمن العفاريت السمان

*****

اصمد يا صاحبي لموتك العبثي
باعوا الوطن ياصاحبي بالمجان
مجان لكن ما نقدروش أتمان
ما راح زمان ( الشاذلي والجمسي

)

وشمس سينا يوم ماعششت
صدرك العريان
غابت فانسى الحرب يا غلبان
أعداء وطننا صاروا أحبابه

موضوع: رد: حوار مع الأبنودى 12/7/2008, 2:18 am

مستمتعين بالوطن والوقت خان الوقت ــ
بيسلكوا وكأنهم أصحابه
أنت العدو دلوقت
أنت نشاز اللحن
أما احنا يا بطلي الحزين
فمدينا لهم للحياه
شريان ورا شريان
زعيقي وسط الخلق زي سكاتي
وتفاؤلي بقى جزء من احباطي
اتغيرت كل العقول

واتبدلت كل الفصول
واتعفرت كل الشموس
واتغبرت كل النفوس
وزي ما تقول قول

!!

اسمك بهت

وكأن عمره ماكان
اتباع كأنه بضاعه ف الدكان
في الانفتاح على عورة الأوطان
آدي الجناة أبرار

...

وانت الخاطي

.

وانت غلطة الوطن

في صفقة الشيطان
يا عبد العاطي
أنت نويت

وأتاري فيه غيرك نوى
ناس عليو فوق
وسابوك بتبحث في الفتات
عن الدوا
لكبدك اللي ما احتملش فانشوى
يا صاحبي موت أرجوك
وموت الغضب

الاسم كان هوه الهدف
رفرف على مرمى النيران

وكأنه قاصد ينضرب
الاسم ضلم وانشطب
ومصر مصرين

مصر احنا وهمه
لهم الغنايم والبهايم احنا
صوتهم وجع مسموم

بيسكن العصب
ويلهب اللهب
ياصاحبي موت أرجوك وموت الغضب
لعينيك ياصاحبي بانتمي
كان صدرك هوه صدر بلادي
من الهجير باجري عليه
واترمي
وأنا قصدي أغسل همي.. بازداد هم
عفوك ياعبد العاطي
الوطن عمي ( بكسر العين والميم

)

وامشي وهملنا يابن العم
واسمك المشطوب
مازال هناك مكتوب
في قلب سينا في سرها الدفين
في صدور جميع المخلصين
المرضى زيك ياوطن
واللي حيغلبوا المحن
واللي حيجلو عنه عار الغبار
عشان يشع اسمك كأنه نهار
الاسم ـــ رمز العزة ـــ
بيصيبهم بداء
ينسوك ما ينسوك . الضمير متذكرك
هنا مش هنا ــ صدقني ــ
بكره حافكرك
مين اللي قال يامصر ابنك ضاع؟
دحنا حنعلن ع المشاع

اسم اللي باع حلمك ياعبدالعاطي
للشرق أو للغرب
للأهل أو للغرب ( بضم الغين

)

ولحد داك اليوم
سيب الحياه تمشي لورا بالورب
مين ده ياعبد العاطي
أبو جته جامده وكرش؟
اللي بيحدف بالمتين مليار
ويعز ع الناس قرش؟

!!

هل شفته يوم الضرب؟
هل كان معاك في الحرب؟
أتاري دم الشهدا له أتمان
تمن الشهيد مابيقبضوش والدب
انهب وصيع بينهبو المقاطيع
ويالله بيع كل اللي شلناه للزمان
ويكون شعار بلدك
وبدال ماتبني بيع

.

هنا تكتشف ان الخراب
هوه الربيع
بيع المصانع والصحاري واشتري
آخر حدود الأرض والشواطيء
وهكذا
مصر اللي كانت ملكنا
واللي حميناها بصدرك عننا

انسحبت واحنا في عز النوم
انسحبت في السر وف كام يوم
هربت كده علنا يا عبدالعاطي

****

مش دي البلاد اللي حاربت عشانها
ولا هم دول ياصاحبي حكامها
ولا مصر دي اللي رفعت أعلامها
ورميت بروحك في خضم الحرب
ونيرانها

.

فين احنا دلوقت ياعبد العاطي

مين اللي وطى العالي ياصاحبي ؟

!!

وعلى الواطي ( بتشديد اللام في على

)

مين اشترى بتمنك الصحرا والشاطي
وطاطي
فاكرنا وراه حنطاطي
وصالح القاتل وعادانا
وادانا ضهره وسابنا ببلاهه
نعد قتلانا
وهرب بمصر وخبى عنوانها؟

!!
****

ارحل ياعبد العاطي
يابن الطيبين ارحل

ارحل وحيدمظلوم حزين أسهل
كل القصص ماتت
كل المثل ماعت
كل الحقوق ضاعت
البياعين باعت
أهل القيم صاعت
وأهل الحقوق جاعت
حتى اللي صابت
من جديد خابت
كله اتمسح والزور
هوه اللي شادد خطوته
وثابت
والنصر كان ياعم عبد العاطي
أهم أغلاطك وأغلاطي
ارحل بتتفرج على عشوش اللصوص
المحروسين ببدله ظباطي

!!!
*****

ياللي كسرت القانون
وحاولت وطنك يكون
مات الوطن
ورجعت الميه تاني تمشي في الواطي
يابطل زمانه فات
ياصياد الدبابات
يامجسد الحسرة
فى أسوأ معانيها
ماعدش غير الموت حرية
ارحل ياعبد العاطي
لا أكل ولا ميه
لاحلم بالألوفات ولا الميه
الحسرة وطنية
الحسرة وطنية
دواها لا من صبر ولا من نوم
انت الشهيد اللي ضل وعاش
لحد اليوم
ماعدش شيء ينباع
يا مزعج اللي تاجروا في النسيان
في وطن بيشم بالصمت
وما عادش لازمه سماع

****

عارفك ما متش علة

مت تعب
ماهو كام سنة يا صحابي
يحتمل الحطب... نار الغضب؟
وكل ما تبرق صور في الذاكرة
للدبابات اللي حرقت ( بفتح الحاء والراء

)

أو الجنود اللي قتلت
ولما م الضحك اتمزعت
بفرحة النصر اللي كان ابداع
كل اللي ضاع منك
مع اللي ضاع
تخمدها بكفوفك بصمت رهيب
من غير ما تعتب ع الوطن
وتودي وياه في الألم
وتجيب
كلمنا وانت في السرير عيان

عن اللي ولى ...وخان
وعن اللي باع النصر ف الدكان
مش ده الوطن
اللي اتفقت معاه ياصاحبي زمان
تئن والأنين مرير

وانت بتتقلب على السرير
سرير فقير
تطلق زفير الحزن في النفس الأخير
ولا الشاشات بكيت

ولا المذياع أذاع
فاكشف غطا وجهك
ومزع القناع
بلا حكومة

بلا رئاسة

بلا معارضة

بلا بتاع

.!!
**** عبد الرحمن الأبنودي

في 16 ابريل بباريس

2008

********************

علـــم الدولــــة :

ربنا يشفيه ومرضى المسلمين جميعا

» الأبنودى
» حوار مثير
» حالة حوار
» حوار جد مع حفيدته سنة 2040
» حوار بين البيبسى والميراندا